避唱祖兒啲歌？劉浩龍開騷走音關特效事

歌手劉浩龍（師兄）昨晚（27日）於旺角麥花臣場館舉行個唱，師兄唱完11首歌之後，師兄終於開金口，先來「利申」因為台上有煙，令喉嚨變乾導致「痰上頸」，條脷仲白晒，先會搞到「走音」，絕對不是故意：「到第11首歌先同大家傾偈，因為想唱多啲歌畀大家聽，今次開騷都有壓力，因為幾年冇開都有生疏，盡量嘗試，就當好似做電台DJ咁，播吓歌又講吓嘢。等大家Warm Up吓先，不過今晚把聲好得，真係唔係走音。」

臨急學唔切吹口琴

師兄換上黑色花花西裝再現舞台，唱出《Mr. Wrong》，背後的螢幕則播放他有份拍攝的電影畫面，其中當播放與容祖兒合演的電影畫面時，全場起哄。之後師兄用結他自彈自唱《Better Man》，唱畢突然向台下單眼，師兄即時澄清話是向陳奕迅單眼，並表示：「今晚嘅天才表演已完成，本身玩樂器嗰度係想玩口琴，但買咗番嚟搞唔掂，得番嗰幾星期，就彈結他，講得出話會喺騷入面玩樂器就做得到，我盡晒力。」說畢就帶來另一首經典歌曲《二等天使》。

開騷生疏眼濕濕

之後師兄話特別欣賞、喜歡兩位歌手，而原先的歌單內包括祖兒的《牆紙》，惟於音樂一起，雖然是《牆》的前奏，但實質是歌單的再之後一首歌《今生不再》，明顯是直接跳過不唱。期後唱完《緋聞男友》時，又話：「好耐冇聽過掌聲，綵排嗰時對住空櫈冇咩感覺，希望下次再同大家見面，我唔會做佛系歌手，因為生疏咗再上嚟嘅感覺好難。」講到呢度，師兄明顯眼濕濕，一度要停一停再講：「會好好就住今晚呢個感覺，多謝大家！」之後送上《Change Your Life》。

---------------------------

東網巨星開咗ig喇，大家快啲follow啦！

https://goo.gl/KGuo2N