遺憾！趙學而開騷請唔到王傑合唱金曲
歌手趙學而在紅館騷後接受訪問，對於唱《誰明浪子心》時缺少另一半王傑，她表示曾有邀請對方：「因為佢之前話會退隱，所以近期喺內地嘅期真係排到好密，返唔到嚟，就唔好勞煩佢喇，今次當係一個同觀眾互動嘅版本都幾好。」
封嘴唔爆「高層」個名
講到演唱會上多次強忍淚水，趙學而坦言十分感觸，笑稱試過喊住唱歌，所以決定今次唔喊，盡力做好！問到是邊個「位高權重」的人說她「沒有價值」？她就封口：「我話咗唔講就唔講！（咁邊個話你唔唱歌唔使死？）嗰個我曾經講過，係一位男性高層來嘅，你哋慢慢估喇！（咁係咪都多謝嗰位高層？）梗係多謝喇！如果唔係佢嗰番說話我都唔會有咁大嘅決心繼續行落去，當然自己會有價值觀，但係唔等於人哋嘅一句說話可以抹殺你過往嘅所有成績，好多謝佢呢番說話令我可以喺唔同嘅範疇再得到好多成績，到今日可以返嚟舞台唱歌畀大家聽。（係咪都可以爭氣畀嗰個話你冇價值嘅人睇？）我為自己爭氣囉，我唔覺得係要做畀任何人睇，應該係做畀自己睇。」
黐到實唔怕走光
至於在演唱會上大膽以Bra Top性感上陣是否給老公看？她笑言：「老公係唔使睇嘅，佢有咩未睇過呀？（但係老公特登企前去睇喎！）哈哈，可能喺屋企冇乜幾可戴呢啲咁硬嘅款，所以要睇真啲啩，等我今晚問吓佢！不過真係一日比一日瘦，啲衫都要不停改，（驚唔驚走光？）好安全，黐得好實，唔使擔心。」
想再戰紅館
對於「老猫燒鬚」甩嘴，趙學而表示入行多年第一次唱紅館真的有壓力，笑稱觀眾最鍾意睇蝦碌他們應該不會介意。在演唱會上講到會再戰紅館，她笑言：「講係咁講啦，呢啲嘢好有靈活性嘅，真係要睇大家支唔支持。如果有機會當然想啦，自己好想試吓做唔同場地，想做唔同形式嘅音樂表演，令多啲人聽廣東歌。」做完演唱會她說首要是要瞓飽食飽：「喺屋企瞓飽再填飽個肚，雖然呢幾日都不停有食嘢但係都唔係好食得落，個人又一路瘦咗，食飽瞓足再去諗放假。」
----------------------------
東網巨星開咗ig喇，大家快啲follow啦！