鄧健泓開騷自爆曾受辱：番茄酒樽飛埋嚟
20180430
東網電視
更多新聞短片
呢啲真係辛苦錢。
事隔10年再開騷的歌手鄧健泓（Patrick），昨晚（29日）於旺角麥花臣場館舉行演唱會，好友陳倩揚、鄭敬基各攜另一半到場支持，另外亦有《閃電傳真機》拍檔譚玉瑛及蓋世寶、鍾麗淇、葉文輝、余迪偉等圈中好友撐場。演唱會於8時43分正式開始，先有樂手上台準備，當中包括太極樂隊結他手鄧建明（Joey），接着就有老婆石詠莉（Sukie）擔任旁白，介紹Patrick出場，此時身穿紅白格仔、戴上同系列煲呔的Patrick已站於台中，舞台着燈的一刻，台下Fans拍手歡呼，場面墟冚！
Patrick先帶來新歌《那年。某日》，雖然開騷前突然感冒病倒、激瘦28磅，但並沒有影響演出，於台上賣力演唱。唱畢便跟Fans打招呼：「大家好！歡迎大家嚟！」他又話相信好多朋友認識他都因為電視節目，之後便帶來《恍如隔世》、《我愛胡思亂想》、《起飛》、《阿四》的歌曲。
期後Patrick就話多謝一直問他幾時出歌的Fans，給予他開今次個唱的勇氣，他又自爆曾於內地夜場演唱，並分享當中趣事：「佢哋嘅宣傳手法好特別，如果有上過電視，就會話係『TVB力捧小生』，如果出過碟，就會話係『全香港最喜愛男歌手』，而我佢就寫『男神降臨』。有次試過要搭7個鐘車去潮州，點知途中想去廁所，工作人員就畀咗嗰膠樽我，仲好好心咁Cut開足夠空間畀我處理，不過最後佢都洗咗車箱好耐。」令全場Fans都笑爆咀，接着他便唱出夜場受歡迎的《拍子機》，唱到《Can't Take My Eyes Off You》，Patrick High爆落台與Fans握手。
唱畢，Patrick繼續爆料：「當時喺夜場收到好多嘢，例如新鮮嘅番茄、飛過嚟嘅煙頭、酒樽，活生生咁被污辱。」又指身為藝術工作者就要做到最好，要演唱可以大合唱的歌，之後唱出《友情歲月》。
----------------------------
東網巨星開咗ig喇，大家快啲follow啦！