背劇后壓力！嘉玲重踏舞台同謝君豪秦沛鬥戲

貴為舞台劇劇后的劉嘉玲7月與謝君豪再度合作演出英皇舞台劇《奪命証人》，今次更有「舞台新人」秦沛與他倆大鬥演技，相當有睇頭！嘉玲於2015年憑舞台劇《杜老誌》封「劇后」，今趟再踏舞台，她承認有壓力：「我都好鍾意呢種少少壓力，畀動力自己去追求完美，舞台係一件令人好享受嘅事，帶畀我好多新經驗再帶番去電視、電影方面，電影演員好被動，全部係導演嘅傑作，我哋係配合導演完成一個夢想。」

崇拜謝君豪

同樣沉醉於舞台的謝君豪則說：「舞台上每一刻都屬於演員自己，主導性強好多，要控制節奏，冇剪接、後期製作，一口氣到尾，電影上都有啲鏡頭自己覺得幾好，但最後出街竟然剪咗！」問到二人是否約好再次合作？嘉玲笑言能與君豪三度合作，感到幸運：「佢係話劇王子，我好崇拜佢㗎！佢脾氣又好，冇大老倌架子。我依家最驚係秦沛囉！你唔好難為我呀！」

隨時演上癮

秦沛應毛俊輝導演邀請「處男演出」，但要看對手的他，先致電嘉玲確認演出，才揮筆簽約，嘉玲笑言：「平時佢好少打畀我，不過見到面就好似屋企人咁，有一日突然打長途電話畀我！」問秦沛會否擔心演上癮？他笑言：「咁要睇咩演員，同嘉玲咪上癮囉！」

場地：半島酒店

劉嘉玲化妝：+0　

髮型：Ken Hui＠ii Alchemy

----------------------------

東網巨星開咗ig喇，大家快啲follow啦！

https://goo.gl/KGuo2N