影相冇預影對腳　李麗珊臨急搵鞋慘被甩底

奇妙電視主持兼歌手李麗珊（Lisa）預計將7月推出第二張個人大碟，受訪時她興奮指唱片製作部分已經進入尾聲階段，日前更動員多位好友為唱片拍攝封套，Lisa感恩話：「好好彩身邊有好多朋友都好樂意幫我實現夢想，由造型、換衫，甚至係後期製作都有佢哋幫手，嗰日一共都影咗3個造型。」據知今張大碟的構思全權交由Lisa去創作，發揮空間甚大，所以她對「製成品」都抱有好大的期望：「由揀歌開始去到隻碟嘅設計都係自己諗，盡力去做自己能力上做得到嘅嘢，始終上次隻碟喺拍攝技術、角度上都未必係最滿意，希望可以做到盡善盡美。」不過期望愈大，壓力就愈大，Lisa於拍攝封套前的一個星期突然患感冒，故拍攝當日都是抱恙上陣，非常敬業﹗

談及今次拍攝的趣事，Lisa笑話事前冇預料到會影全身相，所以都冇特意去配襯鞋的部分，幸好多得身邊朋友提醒，才於拍攝前兩日「臨急抱佛腳」搵鞋，不過其中一對鞋於拍攝期間「完美甩底」，令在場所有人都捧腹大笑：「有對銀色吊帶高踭鞋實在太耐冇着啦，去影嘢個陣突然成個踭飛咗出嚟，好好笑，之後佢哋幫我用膠紙幫我整番，頂住影到兩個造型。」而今次拍攝注重於表情上令Lisa大呻好難：「要對住鏡頭做啲好Cute嘅表情，平時嘅我唔會做，不過為咗隻碟都頂硬上，搞到出嚟個效果好似做瑜伽動作咁，好搞笑！」她又指希望新碟會畀到大家耳目一新的感覺。