婚後首孖老公拍床戲　石詠莉自爆激到扯甩簾

藝人鄧健泓（Patrick）與太太石詠莉到青衣為劇集《向西聞記》之《碌架床》拍攝，婚後不久便與太太拍「床戲」，Patrick笑言：「要多謝老闆畀機會，夠晒寫實！溝通上又好啲，唔使點夾戲，見到王宗堯同Jessica（女子組合SuperGirls成員蔡明思）就要講到明跟住做啲咩。（情不自禁錫老婆？）我會分公事同私事，返到屋企先做私事！（想試多啲對手？）可以再多啲新鮮感嘅。」

未有換大屋打算

石詠莉表示首次床戲獻給老公，坦言演出上舒服好多，開心能合作一部愛情動作片，自爆前一日拍攝時激情到簾都扯甩！問小倆口嘗過「土地問題」後，會否有壓力換大屋？Patrick笑說：「依家屋企都千幾呎夠用，可能郁動少啲囉！（生B都夠？）屋企有間係工作房，平時練歌就喺裏面，買屋時都預咗，可能到時再整一整。」