藝人王浩信（Vincent）現身首飾活動，提到日前他與太太陳自瑤（Yoyo）出席陳敏之老公的慶生派對時，兩人在大合照中企在離行離列，引起網友揣測兩人感情狀況，Vincent解釋只是男女各企一方，多謝大家關心，但希望大家不要太過敏感。

談到母親節，問到會否代女兒向太太表達心意﹖他坦言：「呢個交番畀我囡囡，佢知道點樣去表達愛意，我要將我嘅愛意畀我嘅家人，我嘅媽咪以及我媽咪嘅媽咪，之前佢嘅身體經歷好大嘅挑戰但已經康復。（有咩病﹖）我唔講得太詳細，怕畀到壓力佢，依家都會抽多啲時間陪佢哋。（係咪會減產？）其實我依家都有六、七個小時陪小朋友，彌補番之前因為忙拍劇而陪唔到佢，但唔會減產，我都想帶啲新嘢畀觀眾，嚟緊會有套新劇開拍，暑假會開始忙，依家盡量陪咗小朋友先。」Vincent稱女兒很叻女，憑面試考入一間心儀的小學，不過，該小學需要家長經常一齊參與學校的親子活動，問到會否因夫婦倆是公眾人物，擔心在參與學校活動時會引起關注？他表示：「佢間學校有好多唔同國籍人士，佢哋都唔識我，只要唔影響其他人嘅情況下，我會盡量投入學校活動，因為我都試過為人子女，都想父母可以同我一齊參與社交活動，我都係以呢方面為目標。」

感謝大家提醒

另外，Vincent近日被拍到踩單車時衝紅燈，他稱多謝提醒他有關踩單車的道路意識，因為他對相關知識較貧乏﹕「我都多踩單車，希望可以減低碳排放，當日我買咗外賣返屋企，因為怕啲嘢食變凍，所以就踩快咗少少，我以後會減少碳排放之餘又小心交通安全。」他指也有教女兒踩單車，希望今年可以跟女兒齊齊享受踩單車的樂趣。