山頂變頭排　Harry港騷勁冧粉絲：要搬來港

英國著名男子組合One Direction（1D）成員Harry Styles單飛發展人氣不減，昨晚首度於香港會議展覽中心舉行個唱，雖然遲開騷，但一出場即瞓身冧盡粉絲，仲話要搬到香港！演唱會原定8時開場，不過暖場嘉賓唱完之後，等咗大半個鐘都未見Harry出場，去到9時15分左右，他終於現真身，一身sharp到盡閃爆星星黑白服飾示人，接連演唱《Only Angel》與《Woman》，輕易炒熱全場氣氛！

Harry不但晒靚樣靚聲，全晚更多次與粉絲交流，同粉絲打招呼之後就多謝大家撐場，選擇一齊度過呢個晚上，更冧爆表示：「我今晚得一樣工作，就係娛樂你哋！」全場即時狂叫，Harry仲話會盡力娛樂粉絲，又指粉絲亦只有一樣工作，就係盡情解放做自己喜歡的事，齊齊跳舞大合唱！

單飛僅年多時間的他另感性表示：「好多謝你哋熱情歡迎我，對我好大意義，因為我只係出咗一隻碟，得10隻歌！」但他亦即澄清成個騷唔會得10隻歌，會唱吓新歌同舊歌，隨後即唱出1D的歌曲《Stockholm Syndrome》，粉絲即時High爆大合唱！

另外，Harry見到現場有不少外籍粉絲，多次問大家來自邊度，發現唔少人來自家鄉倫敦，當中更有一個定居香港21年嘅女粉絲，當個個粉絲都話留喺香港好開心時，Harry即表示：「我都要搬黎香港！」即時引來粉絲瘋狂尖叫！賣完口乖，Harry更加碼送驚喜，突然由主舞台走落場，走到現場Panel的小舞台演唱，本身坐於全場最後排看台區，即係「山頂」的粉絲由尾排變頭排，紛紛湧到舞台前，興奮唱跳！除了錫粉絲，Harry更即場為昨日25歲生日的工作人員當眾慶祝兼帶領全場唱生日歌，場面Warm爆！

Harry全晚唱足17首歌冧粉絲，當中包括1D名曲《What Makes You Beautiful》，不少人離開座位於樓梯間邊唱邊跳，Harry除揮動英國國旗，完場時亦有接過粉絲帶來，象徵同志平權的彩虹旗，曾傳為雙性戀的他似乎豪不避嫌大方撐平權，演唱會最後於10時50分左右結束。