成功擊退癌魔　林利正式復工：唱歌好夠氣

前小虎隊成員林利為無綫節目《流行經典50年》擔任嘉賓，年初發現患上直腸癌的他，表示休養了三個月後，今日正式開始投入工作：「醫生都話唔使再做化療，自然康復，好彩之前有Keep住運動同早睡早起，恢復得算快。」他表示之前的手術需要劏肚，導致動氣，故比做微創時的休息時間稍為長：「塊面都生番啲肉，一切都好正常，頭先第一次唱歌都仲好夠氣，今次會唱一首舊歌叫《始終怕講》。」

心態戰勝癌症

林利表示患癌症時的心態和情緒非常重要，自己深信自然療法，每日早上五時起床，然後去行山及曬太陽：「我寒同酸性底接觸多啲太陽，等佢鹼性多啲同體能恢復快啲。（行山行幾耐？）行到7點之後食早餐，之後8、9點去行或者慢跑。（撐到咁夜表演會辛苦？）晏晝會瞓一陣，就算20分鐘都好緊要，夜晚10點就會瞓覺。」

有替身代拍打戲

林利透露稍後兩日就會為網劇《鐵探》開工，全部外景拍攝，問可有洽談休息時間多一些？他說：「冇特別傾，外面拍通常得日班或夜班，就算夜班都唔會難捱。（有冇講明開幾多個鐘？）冇，咁會好難就，導演同監製大家都熟悉，唔會特登為難我，同埋套劇動作戲多，導演話唔使驚，有替身幫忙。」

----------------------------

東網巨星開咗ig喇，大家快啲follow啦！

https://goo.gl/KGuo2N