劉雅麗堅持新歌舞劇非模仿：角色名都唔同

藝人劉雅麗（Alice）和譚偉權（Gary）為二人合作演出的歌舞劇《絕代芳華》出席記者招待會，由Kellyjackie擔任主持人。該劇以梅艷芳和張國榮的生平故事作藍本，將於七月於新光戲院公演一連七場。Alice在台上透露歌舞劇成本有七位數，服裝和舞台設計都是不惜工本，適逢梅艷芳和張國榮逝世15週年，所以公演特別有意義。

自爆識於微時

接受訪問時，Alice笑言和Gary二人識於微時，十分有緣分：「中學已經認識，演藝學院又係同班同學，合作過好多次，大家咩都可以講，有晒默契，當年仲一齊去過歐洲旅行，點解我哋冇結婚嘅？哈哈！不過真係好難得，劇界嘅人叻唱歌嘅唔多，又咁啱Gary鍾意張國榮，我鍾意梅艷芳，係好有緣分。今次多咗十幾首以前冇唱過嘅歌，所以要係咁捉住佢同我練歌。」

唔驚被批評係模仿

問到二人演繹一代巨星，會否擔心惹來別人的批評？Alice就話不怕：「我覺得唔驚，因為連角色名都唔同，我哋唔想去模仿。」Gary都話：「絕對唔係模仿，亦都冇人可以代替佢哋（梅艷芳和張國榮），我哋只係做一個創作劇，攞佢哋嘅生平做一個藍本，講嘅都係兩個巨星嘅故事，如果大家真係要對號入座就冇辦法，但係我哋只係借助佢哋嘅歌曲去創作角色。」Alice話：「如果模仿就一定會有人話邊忽似邊忽唔似，同埋我哋嘅劇情又會被猜度，我哋想避免呢個情況，希望大家真係來睇套戲，唔係來睇模仿大賽。」