揈忌廉兼扮獻花!肥媽慘遭連環整蠱

20180510
東網電視
更多新聞短片
肥媽當年上節目慘遭連環整蠱!
藝人肥媽同契仔陸浩明最新主持嘅節目《食好D食平D》今個星期首播,肥媽除咗識飲識食、喺飲食界稱霸之外,個性率直,講嘢夠晒中氣嘅佢,原來後生時曾經眾目睽睽被整蠱!
無綫不時會翻摷以前節目《歡樂今宵》嘅舊片出嚟回顧,估唔到今次到1990年嘅肥媽!佢不幸地上咗其中嘅「偶像大整蠱」環節,當時36歲嘅肥媽着上全黑透視裝亮相,並接受幾項挑戰。大家可能淨係記得肥媽係食神,但係其實佢都係歌手出身,當晚佢要邊唱歌,邊被兩個「相撲手」騷擾。不過實情唔係咁簡單,原來「相撲手」仲手持忌廉向肥媽攻擊,搞到肥媽變咗花面貓,都仲要繼續邊跳繩、邊唱歌,冇練過氣真係唱唔掂!
以為獻花環節已經係尾聲?點知先係噩夢嘅開始!有一班扮演狂迷嘅演員,向肥媽獻花時乘機瘋狂糟質佢,搞到佢跌咗落地。不過好彩肥媽夠大量,不單止冇嬲,仲同大家玩埋一份,認真夠玩得呀!有網友話畀着係自己一定會嬲,大讚肥媽好玩得,仲話以前無綫嘅節目大膽好多,回憶返晒嚟喎!
網民有話兒:
Cxxxy Cxxn:肥媽當年五官好精緻,係靚女一名!
Ixx Cxxn:以前tvb啲節目都幾癲…
Sxxxy xo:細個成日追歡樂今宵,回憶番(返)晒黎(嚟)~
Joxx Cxxu:肥媽以前都幾fit喎
----------------------------
東網巨星開咗ig喇,大家快啲follow啦!