期待收仔仔中文情書　李嘉欣嘆時間過得快

大美人李嘉欣的寶貝仔許建彤（Jayden Max）不經不覺已7歲，今年嘉欣將會與兒子一同度過第7個母親節，她揚言最希望收到兒子的情書，她說：「之前嘅母親節收過佢畫嘅火柴人和一啲好有藝術創意嘅畫作，只要係佢畫嘅嘢，見到就心滿意足。今年佢學緊中文，識咗好多詞彙，佢話會用中文寫信畀我，好希望收到佢嘅中文情信，唔介意有錯別字。」她說兒子送給她的禮物，每件都會珍而重之放入盒子內收藏，間中收拾時便拿出來細味，她說盒子內還藏有兒子未出世時的第一張超聲波照，可說是兒子送的第一份禮物呢！數數手指她與許晉亨結婚快將10年，今年她與兒子共度第7個母親節，令她驚覺時間過得很快，她說：「有小朋友之後覺得時間過得好快，每個階段眨吓眼就過，有時會唔記得咗過程，呢啲係我同佢之間嘅經歷，人生嘅足印，所以每一件禮物都好特別。」

做足心理準備

今年母親節，許晉亨一早訂了餐廳，讓嘉欣和外母用膳，問嘉欣會否好期待將來有天由兒子安排母親節節目？她說：「坦白講，我唔會有期待，佢係男孩子，唔覺得男孩會主動安排節目畀媽媽，我心理上調較咗係冇先，唔想自己失望，將來如果有，我會好安慰。」她揚言對老公要求就好高，但對兒子要求寬鬆，好大包容，她笑說：「老公係要嚟差遣，媽媽就畀個仔差遣，哈哈！自己講完都滴汗。Jayden會恰我，同我冇乜嘢傾，通常係咁，會恰自己最鍾意嘅人，佢唔會恰陌生人，同人哋friend過同我。」她續說：「之前同親戚食飯，席間有兩個媽媽，佢哋啲仔女都大晒，講到母親節，個媽媽話啲仔女有節目，交低錢畀個媽媽自己慶祝，個媽媽講時都冇嘢，仲大笑，（如果將來Jayden都畀錢你自己慶祝呢？）我唔會太開心囉！最好唔好，如果真係咁，同個仔關係又好好嘅話，佢又咁啱要去旅行嘅話，咁自己都要EQ高啲。」笑言現在未至於去到「太sad」地步。

有共識唔再生

Jayden現就讀小一，做媽媽的擔心又是另外一個層次，現時嘉欣最關心兒子是否結交到朋友，多於學業成績，問到嘉欣會否再生？她笑說：「唔生喇！有個朋友話夢見到自己老婆有咗，仲生咗個女，發夢已經好開心；我有問過老公，有冇發過呢個夢，佢話從來冇發呢個惡夢！」