目擊古巨基墮台受傷　Sa嚇到胃痛祖兒呆晒

歌手古巨基（基仔）尋晚（11日）喺紅館開騷，期間誤中舞台機關墮地受傷，幸好經檢查後發現傷勢並無大礙，今晚如常開騷！而陳豪夫婦及邵仲衡等尋晚亦有睇騷，佢哋都分別喺社交網為基仔送祝福。

阿Sa嚇到胃痛

尋晚唔少圈中好友亦有捧基仔場，完騷後一班好朋友也到後台等基仔，蔡卓妍（阿Sa）直言發生意外時嚇到胃痛，她說：「頭先最恐佈，係發生意外之後，全場靜止咗咁，冇人出聲。我同祖兒（容祖兒）過咗一陣覺得有啲唔對路，於是就返入後台，睇吓有咩要幫手，好彩上天係一定眷顧好人，希望接着下來幾場平平安安，基仔加油。」阿Sa事後喺網上甫咗同基仔嘅合照「報平安」。

祖兒擘大個口得個窿

而同樣有去到後台幫手嘅祖兒就話：「今日第一次見到意外發生，基仔突然消失，台上又熄燈，成場冇聲，我嚇到真係擘大個口得個窿。之後我咪入後台看看是否可以幫手，我覺得古巨基好勁，咁跌法，但係佢堅持到自己意志力、毅力，面對愛戴嘅觀眾朋友 佢一定要完成個騷，我好佩服你古巨基。」之後佢又喺社交網講番事發經過，指到後台探基仔時，發現佢條頸腫咗，但佢當晚為咗令大家唔好擔心，依然堅持唱落去，文尾佢仲勸基仔唔好咁搏命，之後開騷一定要加倍小心：「你跳舞好就係人都知㗎啦！養好身體，不用急着騷畀大家看，來日方長嘛，最後當然是希望你能早日康復！之後嗰三場小心小心小心！」