啫時論風波!方健儀希望陶大宇多多包涵

2018年05月12日 16:31
東網電視
更多新聞短片
《刑事II》重播有收視,依家仲多埋個新話題。

最近在深宵重播的無綫經典劇《刑事偵緝檔案II》,得到不同年齡層的觀眾當新劇般追看,據無綫的內部收視資料所見,這劇於四月底更錄得收視高達8.3點,約54萬人收看,重播都有這個佳績,堪稱經典之作!

不過,同樣追看這劇的方健儀,於前晚連睇三集,事後更在社交平台貼出《刑事II》劇照,留言:「真大鑊!昨晚睇完《刑事II》,太緊張,用盒子一口氣追左兩集到凌晨三點……『啫時』、『啫時』……其實『Jessie』係咪真係咁難讀呢?」連很多觀眾都留意到陶大宇叫Jessie時,讀音常有變異,包括有:「啫時」、「遮時」、「遮匙」等……

方健儀透過邵仲衡向大宇講:「多多包涵!」

方健儀這個說法,令《刑事》系列監製潘嘉德覺得對演員有傷害,這個迴響方健儀亦始料未及,擔心這樣講會令大宇不舒服,所以特別透過邵仲衡向大宇講,希望佢多多包涵,而大宇回覆東網稱:「其實完全唔介意,呢種英文口音係香港文化,好似拍查案戲時,大家都會將Case讀成『K屎』,方健儀係主播,當然會對發音敏感啲,我覺得係啱嘅,我都好欣賞佢,其實咁多人講都證明多人睇啫,大家睇得開心咪好囉!」想不到新聞主播方健儀回家追劇即變成師奶仔,都被「師奶殺手」陶大宇俘虜,睇重播《刑偵II》都咁投入。

潘嘉德:對演員係一種傷害

對於讀音問題,《刑事》系列監製潘嘉德亦力撐演員,認為這是香港文化:「拍時我哋都留意到,亦會用『車匙』嚟叫可盈,佢哋都冇介意過,不過我就覺得咁講其實係對演員嘅一種傷害,大宇又唔係番書仔,香港人講英文係咁啦,唔通你哋講話搭巴士、的士,會讀Bus、Taxi,我哋叫Charles都係讀「抄屎」㗎啦!大宇講得啱,呢個係香港文化!」

潘嘉德呼籲搞《刑事》聚會

由於《刑事》重播收視高企,除查案緊張外,這星期的高潮位更是「大勇」陶大宇、「Jessie」郭可盈、「Carmen」郭藹明的三角關係,Carmen的真面目終於曝光,性格大轉移,亦是方健儀覺得扣人心弦之處,並笑言:「我係是但一個郭小姐,都唔想大宇咁好人,對人太好會畀人錯覺!」而潘嘉德則稱自己都有留意:「呢個角色郭藹明演得好好,佢當年同劉青雲一齊嚟傾角色,劇中佢性格大變後,清純樣即變濃裝艷抹,呢個設計都係佢自己諗,出嚟效果好得人驚,我都有同佢講番,見到佢個造型,我都倒抽一啖氣!」《刑事》有這麼多集體回憶,問可會搞聚會,集齊演員敍舊?潘嘉德在此呼籲希望大家主動名:「好想呀!我想喺度呼籲,因為太多演員,好多都演過其中一個單元,邊位有時間又有興趣,就主動報名!」