凌文龍絲巾贈余安安:契媽一直好錫我

20180513
東網電視
更多新聞短片
兩個感情勁好!
藝人余安安與契仔凌文龍到電台接受薛家燕的節目訪問,家燕姐送贈自家品牌的朱古力給兩人。問到文龍母親節可會與契媽慶祝?兩人表示會食晏慶祝,他亦透露送了禮物給契媽:「因為佢好鍾意絲巾,由相識開始佢一直都好照顧同錫我,所以我攞到獎想多謝番佢。」余安安表示很開心,而問到兩女可會與她慶祝母親節?她表示:「會呀,我哋會一齊食飯,又會去睇馬戲。(啲女會送禮物畀你?)我相信有。」她又謂以前細個女兒會手作禮物:「到大個有錢就可以買禮物,但我好珍惜佢哋整嘅禮物。(最難忘邊份?)佢哋試過喺雜誌剪低啲靚嘅嘢,例如唇膏、衫,然後做咗張好大嘅Poster畀我,佢哋嗰陣都係八、九歲,我到依家都仲有Keep住呢啲禮物,間唔中我都會攞番出嚟睇,好開心。」
文龍亦表示小時候曾做過畫卡給媽媽,但今年要遲些才補祝母親節,因要跟導演飛到美國出席影展,一去就去五日,今趟亦沒時間周圍玩。身為其經理人的余安安就表示:「其實佢去完返嚟綵排多兩日,我哋就要去內地做舞台劇巡演,我都知佢好辛苦,所以買咗個頭枕畀佢飛機瞓得舒服啲。」另外,講到余安安去了古巨基演唱會,但基仔跌落台,她謂真是嚇死:「嚇到呆咗,全場靜晒,之後有啲人話係咪假,我話一定唔係,因為我坐第三行,見到佢講講下嘢跌咗落去。停到咁上下,我哋準備入後台睇佢嘅時候,工作人員就出嚟話冇事啦,我哋就坐番低,見佢上番嚟佢個狀態都好緊張、驚魂未定,但睇佢完整上番嚟、清醒都安心,見佢一直唱歌都冇問題,係跳舞見佢可能跌親就硬啲,冇跳得咁行,但覺得佢好專業,敬業樂業,希望佢冇事。」
----------------------------
東網巨星開咗ig喇,大家快啲follow啦!