好新抱！呂慧儀湯盈盈慶祝母親節預埋奶奶

藝人呂慧儀與湯盈盈等一眾《愛．回家之開心速遞》演員於油塘出席「康乃馨大行動2018」活動，齊齊慶祝母親節，呂慧儀更帶埋仔仔「蟹籽」出席！

活動上一眾藝人玩到癲，先安排爸爸媽媽級的劉丹、呂慧儀、湯盈盈、沈可欣、姚瑩瑩享星級按摩服務，湯盈盈更除埋高踭鞋要求腳底按摩，而單立文即上前為她服務！

未幾單立文與李偉健要體驗媽媽平時湊仔的辛苦，要用揹帶將小朋友揹起再執玩具，單立文就用揹帶揹起三歲的蟹籽，而李偉健則揹起姚瑩瑩的仔仔，二人手忙腳亂，十分搞笑！

呂慧儀收頸鏈做禮物

已為人母的呂慧儀與湯盈盈被問母親節如何度過？呂慧儀表示今晚會與父母，奶奶食晚飯笑指做新抱要乖，自己也是媽媽，故一家人齊齊慶祝，被問到仔仔送甚麼禮物給她？她說：「整咗一條用飲管做嘅頸鏈，佢仲叫我帶返工添呀，都唔知點連戲，所以我有喺屋企戴」又笑指仔仔專制，會管她的衣着！談到與奶奶的感情不俗，她說：「幾好，OK㗎！佢錫我，奶奶幾Open」

盈盈則表示早兩日已經訂好花給媽媽及奶奶，更與囡囡一起包禮物，更準備了禮物給家傭，她說：「話畀囡囡聽，姐姐都係人哋媽咪，佢哋係放低自己嘅小朋友嚟呢度照顧你哋！」更透露今晚會同老公錢嘉樂、奶奶及好友鍾麗淇齊齊吃飯慶祝。至於可有收禮物？她說：「有，收花、手鏈，囡囡有送手作仔，今朝幫我按摩！」