田蕊妮上載舊照憶亡母：真的很掛念你

今日係母親節，好多藝人都有喺社交網貼圖多謝媽咪，雖然有啲藝人嘅媽咪已經離開咗，但佢哋嘅母愛一直在仔女心中！好似田蕊妮咁，雖然田媽媽喺2016年已經離開咗，但田蕊妮今日都有上載媽咪年輕時嘅美照，仲留言話好掛住媽咪：「親愛的母親，你快樂嗎？這些年來我正努力去學習放下一些人和事，唯獨是你，我不能亦不會。你離去後我們只剩下回憶，無論是開心與不開心的都變得無上珍貴。你拖著（着）我的手散步，抱著（着）我親我的臉，你不適時我為你按摩，我們為著（着）些瑣碎事而吵架…一切一切就像是昨天的事。我真的真的很掛念你。無論你身處何方，你永遠都在我心中。母親節快樂！夢中見！」

發長文懷念媽咪

藍奕邦亦有上載童年同媽咪嘅合照，仲同田蕊妮一樣，話自己未能「放下」媽咪，佢發長文表示：「很難相信您（你）已經走了十年。抱歉，有一段時間，我誤信『放下』才算成熟地做人。我怕傷心，所以刻意地忘記您（你）。我讓所有我們的回憶變得越（愈）來（愈）越依稀。我以為要與您（你）disconnect才能向前走。但反而，我變得越（愈）來越（愈）麻目，越（愈）來越（愈）空洞。」佢又講到過去十年，一個又一個難關出現喺佢眼前要佢獨自面對，冇咗媽咪呢個精神支柱喺身邊，佢覺得好孤獨、好無助。佢仲話：「現在，我明白到，我不需要為換別人讚我成熟理性而抹殺我們那麼多的美好回憶。我心中可以留一格去繼續感應你的愛和關懷。我只需放下對您（你）離去的哀愁，而不是要放下您（你）的一切。再跟您（你）reconnect，我發覺再記得起您（你）的聲線神情，感應到您（你）在旁保佑，重新知道，我並不是孤獨的。其實每一個人無論誰到了什麼年紀都渴望可以再做媽媽疼錫的小孩子，因為這是人生最舒服的角色吧。這是不需要覺得羞恥的。媽媽，母親節快樂，我永遠都把您（你）留在我心中。」

而鄭欣宜亦有上載媽咪沈殿霞嘅舊照，並表示每天都應該是母親節。

----------------------------

東網巨星開咗ig喇，大家快啲follow啦！

https://goo.gl/KGuo2N