衛斯理 X Captain Nancy　網友求真．合作

近期娛樂圈熱門人物一定係啱啱榮升做爸爸嘅余文樂，同埋擁有《復仇者聯盟3：無限之戰》第七粒寶石嘅「Captain Nancy」薛家燕，佢兩個呢日仲「合作」拍MV，當然成為網民熱話啦！

話說See See TVB Facebook專頁上載一條短片，片段內容係余文樂、伍允龍同林家棟等主演嘅網劇《冒險王衛斯理之支離人》，旁白交代由於余文樂好靚仔、伍允龍好打得，所以劇集招攬咗好多媽咪級觀眾，於是將薛家燕經典名曲《唏呀唏呀唏》同十字舞舞蹈Crossover《冒險王衛斯理之支離人》，再剪輯成新MV，非常有創意！

片段中薛家燕同森美跳住十字舞不停穿插喺《冒》劇中，每次有打鬥場面，就聽到「唏呀唏呀唏唏呀唏呀唏！」但節奏又出奇地夾，睇到網民哈哈笑。之後唱到「哪怕是萬尺風浪，都可挽手沖天飛」，就出現《冒》劇嘅爆破場面，然後畫面又去番薛家燕同森美跳十字舞，簡直係神剪輯！最後鏡頭仲出現彩蛋，就係苑瓊丹對住鏡頭用震音功大讚個MV：「好好睇呀！」網民仲話希望余文樂唔好掛住湊仔，薛家燕唔好掛住保護「池力共鎮」，要真係抽時間出嚟拍真MV！

網民有話兒：

Yin Lxxm：好想瘋狂跳十字步

Dxxxel Leow：7th stone

KIxx　Ｗxxx：好好笑

Baxx kixxx：期待家燕媽媽同余文樂真合作