湊小春雞腰痠背痛　黎諾懿咖喱耍家氹掂老婆

黎諾懿日前到位於奧運站附近的室內樂園拍攝大家樂廣告，與片中老婆及兒子狂玩瀡滑梯，又大玩吊索滑行，畫面相當有動感亦充滿歡笑聲！

諾懿大讚遊戲好玩，笑言此行順便為一歲囝囝「小春雞」視察將來的玩樂場地。他又自嘲成為父親後變得細膽，不敢玩太刺激的活動，但「小春雞」則遺傳其「奀皮」性格：「佢比同齡小朋友好動，唔使我栽培做運動健將㗎喇！依家佢學緊行路，烏低身扶佢半個鐘條腰已經好痹，男人條腰好緊要，所以奉勸大家真係有仔趁嫩生！」除了是盡責奶爸，諾懿笑言在家中亦是大廚及洗碗工，猶如「阿四」：「我負責煮，老婆負責享受，之後我仲要負責洗埋，但最緊要老婆開心。」

想做荒野廚神

講到下廚樂，今次諾懿為新推出的南洋慢煮咖喱牛腩拍攝廣告，更自認是「咖喱專家」：「我幾乎試勻全港啲咖喱，日本、印度、馬來西亞嘅，各有各風格，我就鍾意冇咁辣、比較甜嘅！」他自言煮咖喱有一手： 「老婆好鍾意食我整嘅咖喱湯烏冬，我氹佢返嚟都係因為我識煮嘢食咋！以前過時過節都係我負責整嘢食，我好鍾意全部人一齊食嘅感覺。」問到會否想主持飲食節目？ 諾懿即提議TVB開一個類似「荒野廚神」的節目：「去荒山野嶺就地取材，回歸自然係一種享受，我睇過外國有啲節目，去到邊就煮到邊， 呢個經驗一定好得意！」

諗定追個女

雖然黎諾懿現階段需要付出很多時間陪伴「小春雞」，但他已經急不及待迎接第二個小生命，透露明年追個「豬女」，湊個好字：「其實都係希望阿仔多個妹妹陪伴一齊成長，聽說食多啲辣可以提高生女的機會，所以諗住多啲帶老婆去食咖喱！」