新五虎合體 古仔讚堅挺基仔揭巨肌會動L
歌手古巨基昨晚第四場演唱會，邀請了TVB以前的好拍檔「新五虎」做嘉賓，古天樂、吳家樂、劉愷威和何遠恒。基仔在演唱會上說：「今日好難得，上次約得四個差一個，今日幾經辛苦搵齊五個。」然後四虎升上台，觀眾熱烈歡呼。古仔上台後叫班兄弟企前少少：「呢個係案發現場位，大家係咪企前少少安全啲。」搞笑提示各人，日前基仔就喺呢度附近跌落台。
笑聲震爆紅館
基仔即說：「案發現場就係企前呢個位喇，反而係企番後少少安全。」古仔望着基仔說：「哈！你都好嘢，咁都冇事！堅挺即係堅挺！」基仔即笑道：「我巨肌嚟吖嘛！」古仔說：「哦！你就係落台嗰下靠條巨肌撐撐，所以冇事呀！」基仔說：「係呀，我動L咁彈番轉頭，哈哈哈……」吳家樂笑說：「唔怪得Lorraine（古太）跟你咁多年啦！」連翻有味笑話令觀眾笑聲充斥紅館。
接着基仔播出五虎當年的舊合照，並叫工作人員拿道具上台，要與五虎重拍一張一模一樣的合照留念，之後就落台換衫，留下四虎在台上吹水，各自發表對基仔的印象，古仔先說：「基仔好飲得，好識做蛋糕……整餅。好跌得囉，咁都可以繼續撐落去，好嘢！」
基仔成日好濕
何遠恒讚基仔是一個好男人，古仔就即刻搞笑問何遠恒：「咁你即係冇講嘢啦，我最近睇新聞，你同個咩彩華散咗……係咪嗰晚我哋約食飯你冇出現，去咗滾，所以散呀？」何遠恒即刻耍手擰頭話：「唔好講呢啲啦。」而劉愷威講對基仔評語：「基仔成日好濕，總之好濕啦！」搞到觀眾又狂笑。
不過最令觀眾興奮都是四虎問觀眾想聽咩歌，觀眾大叫《男朋友》、《今期流行》等古仔的金曲，此時現場即播出《今期流行》的音樂，古仔聽到之後即指着控制台監制錢國偉的位置說：「肥仔，你唔係真係玩嘢呀？」而何遠恒、吳家樂已經隨着音樂大跳古仔當年的拜神舞，令觀眾笑聲歡呼聲四起，不過古仔就求大家放過他：「唱歌可以唱，但舞就唔好逼我跳喇！我拜神拜咗咁多年，唔好搞我啦……」
之後基仔出來，與四虎一齊唱住《我愛毛查查》，並一邊同觀眾握手，全場氣氛高漲。昨晚除了五虎之外，黃偉文、袁文傑與女友、鍾舒漫，陳凱彤等均有前來欣賞基仔的個唱。
----------------------------
東網巨星開咗ig喇，大家快啲follow啦！