咁冇人性？墮台受傷古巨基爆老婆掛住笑

一連五晚假紅館開騷《WE我們古巨基世界巡迴演唱會香港站特別版》的歌手古巨基，順利完成昨晚（14日）尾場，完騷後受訪時基仔笑話今次總算順利做完，大步檻過！問到之後會否休息吓？他指醫生都叫佢休息，正常起碼都要抖兩個星期：「係需要休息先綵排，但下一站19號喺湛江，今次加場加喺前面就係後面冇時間，要運啲道具去浙江，好彩有五月天畀咗呢嗰期，自己都希望快啲開Part 2。」基仔話自墮地意外發生後都有Keep住做物理治療，有搵治療師按摩鬆弛肌肉，老婆Lorraine有幫手按？他笑話：「佢淨係識笑我有橙皮紋，但我跌低佢好驚，爸爸媽媽都好驚想衝入嚟睇。」

要Keep住食藥

基仔憶述當日墮台事發經過，還心有餘悸：「當時係有知覺，突然閃一吓，一秒之後覺得背脊有嘢撻咗一撻，先意識到原來我跌咗，嗰速度快到覺得痛就已經喺地下，真係不幸中嘅大幸，係背脊落地。」他又指受猛烈撞擊後，Chok住道氣，唔知可以做咩：「之後工作人員就叫我唔好郁，等聖約翰救傷隊過到嚟摸我啲手腳，又叫我捉住佢哋隻手睇吓有冇力，就開始慢慢覺得手腳各樣都OK，一路都只係覺背肌同頸痛，覺得唔係咁大件事嗰心都定啲，不過都起唔到身。」基仔續話有工作人員提議停騷，但自己覺得冇乜嘢就想繼續，就上台試吓，The show must go on：「有能力就會繼續做，一上返台就一直摸住條頸，好彩檢查後冇骨裂。（跌嗰時有冇見到老婆？係味咪喊晒？）冇見到，直到上完台再落台換衫先見到，陪我睇完醫生佢安心晒。」問到如何應付之後的演出？基仔話依家有食止痛藥，仲有食放鬆肌肉藥，食咗好瞓啲。

新五虎合體係驚喜

講到尾場Encore時的小插曲，基仔打趣話：「對比起我嗰單就真係小事啦，我已經睇得好透㗎啦，大難不死必有後福，都唔敢想像，每晚返到屋企都同老婆講真係好好好好彩，如果係頭就仲嚴重，如果硬頸啲就好！」他亦特別多謝身邊朋友關心，又話經過今次都會有陰影，更坦承今次意外為自己疏忽：「綵排都幾急幾趕，又對自己記性太有自信，以後都唔會畀啲窿喺自己後面，要眼見啲窿。」談及前晚（13日）邀請新五虎合體反應好好，基仔話係驚喜：「主題係時光機就想搵啲有經歷嘅嘉賓，幾圓滿、幾成功、幾開心！」

----------------------------

東網巨星開咗ig喇，大家快啲follow啦！

https://goo.gl/KGuo2N