童言無忌！李國祥畀小朋友寸唱錯歌詞

歌手李國祥在麥花臣場館舉行慈善演唱會，騷後接受訪問，認為表演可以再熟些：「因為好多嘢記，希望多啲人可以從我嘅經歷裏面得到啟發，所以比以往演唱會記多好多嘢，比較吃力，但好有意義。（第一次將自己故事搬上舞台？）係呀，我平時都唔識講嘢，所以一開始都幾掙扎，但後尾見到小朋友排我以前小時候嘅事，都覺得幾得意，其實我哋之後會出書，會有好多唔同人嘅故事，我係其中一個。」講到他多謝媽媽時感動落淚，他笑言：「我除咗第一次睇稿都有咁樣外，之後綵排都冇事，但唔知點解正式就喊，因為媽媽喺我生命裏面好緊要。」

而講到與很多小朋友合作，收養姪仔的他表示因為本身都有小朋友，故與小朋友相處都Ok：「但有時會畀番佢哋質問，話你頭先唱錯歌詞，因為我要兼顧好多，我話我會改善，結果合作都好順利。（覺得同小朋友合作難過同大人？）大人會互相遷就，小朋友最公正，唔應該話難相處，係我要尊重佢哋。」問到姪仔今晚可有來捧場？他謂未睇：「因為佢聽日後日都要番學，所以17號先嚟睇，同埋今晚第一場，我盡量唔想有太大壓力喺身邊。」