可愛到呢！梁漢文戴住Hello Kitty冧老婆

歌手梁漢文（Edmond）與太太林文慧（Karen）恩愛如昔，羡煞旁人。呢日係Karen嘅生日，出名係「愛妻號」嘅Edmond，當然就為太太花心思慶祝，佢就帶咗太太去食日本料理兼送佢一個海膽蛋糕，仲喺社交網上載多張相，就話：「給老婆的生日蛋糕」見到有唔同精緻嘅食物同咁靚蛋糕，真係見到都想食呀！

而Edmond仲喺社交網上載之前為太太嘅生日照，當時佢為太太準備咗一個Hello Kitty嘅巨型壽包，其中一張相Edmond仲將佢戴喺頭上，Karen開心翹住老公，場面搞笑，難怪Edmond就話：「我老細生日，今年打死我都唔會再逼到我帶（戴）呢頂咁Q可愛嘅帽。」網民都送上祝福，仲話Edmond每年都會預備一個好特別嘅蛋糕，真係好有心思呀！