《韓薦》：李成景擁異能戀有錢仔李尚允

又到新一期《韓薦》！今期為大家推介韓星李成景同李尚允合作嘅新劇《想暫停的瞬間：About Time》，二人將上演奇幻愛情故事。李尚允今次扮演有錢仔，李成景就飾演靚女音樂劇演員，仲擁有可以睇到自己同人哋壽命時間嘅能力，單睇個故仔都幾得意。

電影方面，今期會為大家介紹李成景同男星劉海鎮合作嘅韓片《摔跤選手》，內容係講劉海鎮將摔跤嘅夢想寄託喺個仔身上，但佢個仔就喺國家隊選拔賽之前玩失蹤，而個仔嘅青梅竹馬李成景又突然同自己示愛，搞到佢好頭痕。

至於音樂同綜藝方面，就會為大家推介男團Pentagon嘅新碟主打歌《Shine》，同男團Wanna One嘅真人騷節目《Wanna One GO X-CON》，仲有《Produce 101》第二季出身嘅柳善皓喺V App直播挑戰種蕃茄同生菜，咁精彩內容千祈唔好錯過！