天后誕晒唱功 麥皓兒順便狂擦小食

2018年05月17日 09:07
東網電視
更多新聞短片
麥皓兒早前獲邀為天后寶誕慶祝活動擔任表演嘉賓。

藝人麥皓兒(Joey)近日頻頻出騷展歌喉,繼之前舉行個人音樂會,日前佢獲邀為天后寶誕慶祝活動擔任表演嘉賓。佢大唱偶像鄧麗君嘅歌,氹得現場觀眾非常開心!由於活動日子好近母親節,所以Joey都好開心可以順便同咁多位媽媽慶祝,佢仲話:「我媽咪同屋企人都有嚟,我哋仲一齊食盆菜當慶祝住母親節先,遲啲再食餐好嘅補數。」

除咗做表演嘉賓,Joey都有玩攤位遊戲兼擦街頭小食,實行寓工作於娛樂!佢話:「今次又有得食又有嘢玩,令我諗番起細個最鍾意去呢啲活動,童年回憶即刻出晒嚟!」Joey仲透露獲群眾「集郵」,並指好難得可以同街坊咁親近,並希望將來多啲落區嘅活動。