首個偶像病逝 蘇永康激讚西城秀樹出色

2018年05月17日 12:04
東網電視
更多新聞短片
蘇永康(右)坦言雖然一早已有心理準備,但仍難接受西城秀樹嘅死訊。(資料圖片)

日本男歌手西城秀樹因病離世,終年63歲。歌手蘇永康對西城秀樹的死訊感到婉惜,他向東網表示:「其實喺佢第二次中風,我已經有心理準備,因為依家網上平台發達,我喺網上睇佢前年60歲再同啲歌迷再聚嘅最後一張唱片,我有特登飛去日本買。雖然我有心理準備,但我都唔開心,因為西城秀樹1978年第一次嚟香港,佢應該係我生命中第一個偶像。」

激讚西城秀樹出色

蘇永康續說:「如果大家睇番好多佢過去嘅演出,傳統所有藝人應有嘅聲色藝,佢都有!佢原本係一個鼓手,佢打鼓好叻,佢亦都自創咗一個表演風格出嚟,影響當代好多歌手。可惜佢喺48歲嘅一次中風,中風喺十年內好容易第二次再發,真係好不幸!數年後,佢再發第二次,之後喺網上睇番佢以前唱歌好生猛,後尾已經要搵櫈嚟唱歌,所以好唏噓!我又睇過佢嘅訪問,中風之後佢說話都講唔到,條脷都講唔到嘢,靠佢一對仔女精神支撐佢去慢慢學番,奇迹地企番喺度唱歌,好可惜又病發,爆咗兩次血管都應該問題好大,所以我有心理準備,好唔願望去接受呢個事實。你睇佢同期嘅歌唱手鄉裕美非常之健康,健康係好重要!西城秀樹喺我心入面係代表住70年尾、80年代初日本藝能界一個最top、曾經最紅一個歌手,亦係第一個喺北京可以開演唱會嘅日本歌手。佢做咗好多日本歌手冇做過嘅嘢,第一個衝出日本嚟香港嘅歌手。」

梅艷芳帶西城秀樹蒲

蘇永康更指:「我平時講嘢冇咁雜亂,呢個感受好難形容!依家我唯一希望佢嘅太太同兩個小朋友可以健康成長,家人節哀!我同佢只有一面之緣,我喺佢面前膽敢唱當年嘅《Careless Whispers》,因為梅姐(梅艷芳)叫。唱完之後佢行上台送咗一支煙畀我,但我唔食煙,本來想keep住,但畀個朋友食咗,我仲鬧咗個朋友一餐,嗰個朋友都唔喺度走咗添!所以生命係好脆弱,好多嘢唔係你掌握之中,大家都要活在當下,接受呢個事實,永遠懷念我嘅偶像西城秀樹。西城嚟香港玩,梅姐帶佢出去蒲,特登叫埋我。佢第一次喺伊利沙伯體育館開show,我慳咗幾星期零用錢買咗張$150第一行嘅飛,當年仲未有新秀歌唱大賽,因為梅姐個樣好易認,之後到梅姐參賽嘅時候,我仲認得佢係西城嘅歌迷…我第一段婚姻失敗嘅時候仲住喺淺水灣,梅姐試過半夜入嚟淺水灣同我傾偈,傾偈嘅時候,我哋都仲係聽緊西城啲歌。」

蔡一傑網上悼念

蘇永康續在社交網悼念對方:「我諗大部分人都唔知相中人邊個?佢係我生命中第一個偶像,一個真正聲色藝俱全嘅表演藝術家。他在舞台上的一切仍然深深影響住現在的我,他不須再受苦了,我永遠記住他最燦爛的一面⋯永恆的西城秀樹先生。請安息。」另外,草蜢成員蔡一傑亦在網上發文悼念西城秀樹,指對方是叱吒一時的實力派偶像歌手,望對方能安息。