抛棄包袱豁出去!伍詠薇做反派多人讚

2018年05月17日 15:00
東網電視
更多新聞短片
伍姑娘上電台為新劇宣傳。

藝人伍詠薇(伍姑娘)上電台為新劇《飛虎之潛行極戰》宣傳,受訪時她興奮表示劇集在內地已破26億點擊率,反應好好:「都係第一次拍網劇,原來網上有好多人睇,感受到點擊率嘅威力,自己接咗都好驚,驚影響到呢套咁好嘅劇,今次都當係學習。」她又謂拍劇時壓力甚大,一來要同好多「前輩」做對手戲、二來自己飾演劇中唯一的女反派角色:「呢套係男人戲,要同前輩三哥(苗僑偉)、吳岱融、張兆輝等人做戲,之前都係睇佢哋做戲多,可以合作好開心,但又緊張、又興奮,因為遇到一個咁好嘅劇本,可以同到欣賞嘅對手認真做戲,真係全情投入,挑戰自己。同埋呢個角色係社團大家姐,好破格,今次都冇晒包袱去做。」

接多咗內地工作

談及黃宗澤今次飾演伍姑娘個仔,伍姑娘表示自己完全沒有抗拒、還很享受,抵死搞笑話:「一聽樂小姐(樂易玲)話佢做我個仔,就覺得佢好大舊,同埋我都只係大佢十幾年,不過我唔介意,大啲都受得起,下次畀個孫我都得。」她又指很多觀眾都喜歡自己和黃宗澤這對母子,還有內地觀眾都罕有地表示喜歡她的反派角色:「通常佢哋都好憎反派角色,不過今次佢哋唔係,仲成日問我啲衫同唇膏喺邊買,好搞笑、好似睇韓劇咁。」她坦言受劇集帶挈,有不少內地工作接洽,覺得是Bonus,又指希望香港的收視一樣咁好。

大感可惜

談及日本男歌手西城秀樹因病離世,伍姑娘大感可惜,又稱對方是第一代能歌善舞的巨星:「覺得好可惜,因為佢仲好後生,我小學嗰時佢就已經好紅、係小鮮肉,仲記得佢嗰張黑膠張面封套係男版出水芙蓉,之後有好多明星模仿。啱啱聽到佢走咁都好心痛,希望佢一路好走。」

----------------------------
東網巨星開咗ig喇,大家快啲follow啦!
https://goo.gl/KGuo2N