發哥力撐！張婉婷要舒淇嚴寒河邊拍沖涼戲

導演張婉婷日前接受內地影視公司邀請，拍攝系列導演記錄片。她謂自己怕打擾朋友，所以記錄片只邀請岑建勳、盧冠廷、羅啟銳訪問：「我都唔知佢哋想唔想講，因為我性格好怕搞住人，所以唔想叫朋友出鏡，但呢幾個人都真係好熟，所以唔傾唔得！早兩日我哋去剪接公司拍攝嗰陣巧遇Mr. Fat（周潤發），佢仲即席幫我喺鏡頭前講咗幾句，真係要好好多謝佢！」

脫衣找數？

張婉婷笑言於紀錄片要化妝，又要在烈日下扮Cool非常辛苦，深切體會演員的感受：「我記得有一次要舒淇喺北京零下兩、三度河邊拍沖涼戲，仲要佢着背心又濕身，凍到不得了！當下我覺得好對唔住，答應佢如果拍脫衣舞場景時，我都會陪佢跳！點知道開機時又係好凍，我就話爭住先唔陪佢跳。」問到怕不怕舒淇記住要找數，張婉婷直言對方記得，並笑言：「不過我脫衣有乜用，唔會要我跳番畀佢睇啦！」

嘆永利街今非昔比

記錄片將在內地視頻網站播放，攝製隊更來港到香港大學、永利街取景。張婉婷指其實自己不是太想去永利街：「因為聽工作人員講永利街都翻新，冇昔日嘅味道，所以唔太想返去。」她謂想專注導演工作，不會爆藝人幕後趣聞。