行李唔同步 鄧洢玲即變「闊太」濕平

2018年05月17日 16:45
東網電視
更多新聞短片
鄧洢玲件行李相隔十六小時終於返番嚟啦!

藝人鄧洢玲(阿旦)近日獲護膚品牌邀請,遠赴以色列工作,面對當地靚景,阿旦都有影低好多靚相放上社交網站,佢尋日就上載一張自己嘅背影相,但就留言話自己喺機場等極都等唔到行李:「同大家報個平安先,我琴(尋)晚凌晨已經到左(咗)以色列喇!可惜琴(尋)晚喺機場等極到(都)等唔到我件行李‍♀所以今日拍攝工作都冇衫冇鞋+素顏上陣,唔緊要!又係一個有趣嘅體驗,難得可以兩袖清風咁飛去咁遠嘅地方,一陣仲可以好似闊太咁由頭到腳買過哂(晒)去參加今晚night party你都咪話唔爽皮。換個角度想想;人生會變得更有趣!」最後佢仲鼓勵自己要正能量同樂觀笑對人生。

大約相隔十六小時,阿旦再上載一張行李相,宣布佢件行李返番嚟啦!阿旦接受東網電話訪問時就話自己去嘅時候,安檢都好嚴謹:「但同行有個女仔收到封信,話佢件行李會Delay,我冇收到信,原來自己都係咁,去到以色列等行李,等極等唔到,唔知去咗邊!」幸好之後件行李返番嚟,但阿旦依然要臨急買過晒啲衫,佢話:「其實好有趣,好少可兩手揈揈到一個地方,不過最唔好意思係我此行係工作,要影相同拍片,但我要素顏上陣,好彩冇掉副con,否則要四眼上陣,同埋有保險畀番我,幫補我買番靚裙靚鞋,連內衣褲都要買過,因為我夜晚要去一個party,結果要挑戰三個鐘買晒所有嘢,我着加加細碼,即場改埋先趕得切!」