新劇宣傳被消失 周秀娜有晒心理準備

2018年05月17日 18:27
東網電視
更多新聞短片
周秀娜指監製梅小青事前有同佢講過。

藝人周秀娜(Chrissie)以全白斜肩連身褲造型,出席電訊盈科媒體全新「Now E」OTT服務發布會,大讚此App很方便,有時等車及拍戲等埋位就可以用來煲劇同睇戲,故她表示心郁郁:「依家個個都揸住手機,我屋企好多人,有爹哋媽咪、細佬、依家佢仲有埋老婆,有時番屋企,一部電視分唔到,依家爹咪媽咪都會喺房二人世界,揸住手機當電視咁睇鍾意嘅嘢。」問她可喜歡煲劇?她謂喜歡睇戲多些,笑言自己冇乜耐性:「所以煲劇唔可以揀長集數嚟睇,但如果好有質素或話題性嘅話,其實我都覺得依家電視劇製作好有質素,畫面都好似電影咁,好似我有份拍嘅《宮心計2深宮計》都係咁。」

做好份內事

講到《深》她成為被消失的女主角,宣傳活動、宣傳片等都被消失,對此她表示:「多謝監製梅小青承諾咗我唔會喺劇集被消失,佢事前有同我講過,多謝佢畀我心理準備,最開心係劇集冇被消失。(知唔知會唔會剪走啲戲份?)咁我又唔知道得咁detail,但大家拍得咁辛苦,都想出嚟啲嘢好睇,但我相信都難剪走,因為有好多唔同關係同串連。」問到可有通知她不用宣傳?她謂:「其實拍緊嘅時候都有共識,如果檔期啱我梗係有幾多做幾多,拍完劇後都冇同演員見面,香港宣傳我真係冇辦法,唯有喺自己平台努力宣傳同精神上支持,但大陸宣傳就可以做,度緊檔期。」講到同一時間劇集在其他地方做宣傳,問她可有感不是味兒或不開心?她表示:「唔會,都辛苦佢哋做宣傳,呢啲係公司同公司之間嘅問題,我唔係好清楚,盡量做好份內事。」

謝絕所有飯局

另外講到將於22號生日,問到怎樣慶祝?她表示:「我要謝絕所有飯局,因為我要開工,喺香港拍戲,所以可能要五月尾先可以食飯,想keep番好個狀態,驚食肥咗唔連戲,又驚水腫,因為一開心就食好多,好冇節制。」她亦謂朋友已約緊食飯,自己要度期食飯。