彎到變90度！梁朝偉玩過欄腰力驚人
20180517
東網電視
更多新聞短片
梁朝偉除咗演戲好之外，原來連玩遊戲都好犀利！
影帝梁朝偉一向公認演技出色，加上超高顏值，俘虜咗唔少女粉絲。但原來佢當年除咗做戲叻，上節目玩遊戲都有一手。呢日big big channel就上載咗一段1983年梁朝偉上《歡樂今宵》大玩蓮步舞嘅片段，着上超熱褲嘅佢玩到瞓晒地，而同場更有苗僑偉、黃日華、湯鎮業等資深藝人，認真星光熠熠。
一開始，由湯鎮業領軍嘅嘉賓隊佔上風，個個好輕易就完成任務，而黃日華更唔知係咪因為太輕敵嘅緣故，扮輸公然讓賽，令現場一度出現混亂，不過EYT隊都唔弱，廖啟智、賈思樂等人一樣可以撐住。之後EYT隊派出戚美珍應戰，雖然佢行唔夠兩步就跌低，不過就獲隔籬隊嘅苗僑偉力撐，大叫：「你跌低都咁靚呀！」真係隔住個屏幕都feel到佢哋有幾恩愛，難怪佢哋依家結咗婚咁多年都仲咁甜蜜。
比賽去到尾聲，好多人都相繼失手，唯獨梁朝偉、湯鎮業、苗僑偉同廖啟智玩到最後，而梁朝偉唔止順利過欄，更加可以彎腰成90度直角，腰力絕對唔可以睇小，難怪佢咁輕易就勝出啦！除咗腰力出眾之外，唔少網民都將重點放咗喺藝人嘅超熱褲上，指依家好少機會見到咁多位男神着到咁性感，仲話要好好珍藏呢條片添！
網民有話兒：
txxxx0202：三哥三嫂好sweet呀！
Mxxn Mxxn：個個嗰陣都好young好青春
Henxxxxan Lxm：嘩，朝偉條腰好得喎！
Frxxxxxxo Chxx Fxxh：條褲短到呢～
----------------------------
東網巨星開咗ig喇，大家快啲follow啦！