徐天佑外父催生B:我哋生出嚟一定靚

2018年05月18日 07:45
東網電視
更多新聞短片
如果生仔,小編姐姐等你18年育成!

藝人徐天佑早前現身瑞士天梭表全球首間期間限定咖啡店,他自言有收藏手錶的習慣,亦曾想過送名錶給太太Olive,豈料被對方阻止,他笑說:「佢問我啲Taste得唔得,都係送鑽石最好最直接。」講到有否為人生設下不同的時間點?天佑表示:「我自己就唔係計劃得好足,但我會有目標,啱啱出道嘅時候就希望可以十年時間去到紅館開演唱會,但有一啲目標就唔可以Set死自己,冇話30歲就結婚、幾歲就生BB,因為有太多變數。」

被催造人

天佑與太太結婚兩年半,他坦言開始被外父催問「造人大計」:「阿媽冇催我,佢好自由。但係外父都有啲聲音畀我聽到,例如食飯又會提吓,問你哋有冇計劃呀?啱啱結婚嘅時候會隨口噏吓,因為我同老婆嗰陣時冇認真傾過,到呢兩年又真係開始傾,差唔多個人開始定啲,希望呢一兩年落實,但我老婆又好忙嘅,我又覺得佢身體潺潺哋,大家要夾吓時間多啲見面先得!」他又直言從前不喜歡小朋友:「自己係細仔,好怕見到其他小朋友,我畀人縱壞咗,但係呢幾年見到啲朋友嘅仔女好得意,覺得原來小朋友唔係咁難相處,同埋我哋生出嚟一定靚嘅,自己嗰個點睇都靚,哈哈。」

拍親熱戲老婆有話兒

工作方面,天佑希望歌影雙棲發展,並想演飾一些生活化的角色,他說:「我以前諗拍戲就要係攞獎,但根本咁樣係冇意思,之後就去享受,得到嘅滿足仲大,依家大個仔,想拍內心戲多啲,想拍一啲倫理生活啲嘅故仔,點去面對佢嘅人生低潮。」至於會否拒拍情慾戲?他笑言:「拍電影揀角色方面,我就覺得老婆暗地裏想控制,但我明白自己職業唔係一般人,我本身個專業都係呢一方面,我唔想日常生活影響到工作,不過佢有時會問吓有冇親熱戲㗎?我就會講個故事畀佢聽,由佢自己去調節,大家有商有量。」

化妝:Nikei Mak
髮型:Louis Tse@Number 8
服裝:Scotch&Soda
手錶:Tissot Everytime Swissmatic
場地:TISSOT Swissmatic Pop-up Cafe by BREAD,ESPRESSO &
----------------------------
東網巨星開咗ig喇,大家快啲follow啦!
https://goo.gl/KGuo2N