緣分到自然有老婆！佛系男古天樂講多無謂

「佛系青年」、「佛系男友」等潮語最近喺中港台網絡熱爆，泛指凡事隨緣，唔追求、唔計較嘅「佛系」態度被無限上綱，出現接龍式玩法，「佛系員工」：「唔做嘢，唔上心，緣分到了，自然有糧出」；「佛系減肥」：「唔運動，唔節食，日日食到盡，緣分到，自然會瘦。」我Nuts哥覺得要數「佛系男星」，啱啱做咗影帝嘅古天樂當之無愧！

世界難撈　貼地洗碗

有戲拍就拍，唔恨獎、唔恨出位，幾時見過佢會造新聞博見報，名店掃貨攬女夜蒲？唔恨名牌、唔扮嘢，手機仲用緊八年前古董滑蓋手機，收工就返屋企，做好自己，真係緣分到，自然有戲拍有獎攞。

入行超過廿年、拍咗超過一百部電影嘅古仔，因為都「貼地過」先煉成：「唔放棄、唔退縮、唔怕捱、緣分到，自然機會就嚟。」15歲開始，搬運、保安、Sales乜都做過，就連酒樓洗碗都撈埋！「洗碗都要請個靚仔，世界難撈呀！」呢句古仔感受至深，返工第一日，唔係叫佢洗碗，係洗蛇！嗰陣腥臭，成世仔都記得！

誤打誤撞，幫朋友無端端做Model入行，無心插柳，夠勤力、夠義氣乜都接，歌影視甚至廣告都有代表作！「省姐撚，撚呔撚（想節能，輪胎能）」，以古式煲冬瓜將呢條「撚」胎廣告「撚」足咁多年，成為中港台冧巴溫國語王都未夠，18年前又跳又唱《今期流行》，一首洗腦歌KO全港市民狂Loop，一聽就甩唔到，咁就一世呀，大佬！

初踏影壇　陰陽路都行

講拍劇，楊過、項少龍點走得甩？初踏影壇唔止做古惑仔，連「陰陽路」都要行，鬼上身都係又型又靚仔！雖則曾被話係爛片王，自從被踢爆過去十年喺廣西、貴州等地起咗過百間小學、超過7千個水窖、幾十間診所後，班口痕友冇聲出，你話佢為賺錢拍爛片，但用晒去起學校，低調做慈善家，唔係仲咁多嗲嘛？有情有義，古仔出晒名，唔單止接濟唔少圈中人養人全家，依家仲做演藝人協會會長幫一班上年紀嘅資深演員謀求醫療福利！

黐住阿媽　鬧鐘都慳番

古仔並非hea住等運到，「佛系」態度係表面隨遇而安得嚟、對於在乎嘅人同事特別積極，真係「佛都有火」！對付是非緋聞，三隻字：「冇回應！」講多無謂！但一講電影，兩眼發光！以前就話成龍係大哥，依家古仔更厲害，以佢今時今日嘅知名度，大可以北上印印腳大把人仔搵，反而佢不惜工本去支持香港電影同新進導演，投資同發行嘅電影唔係全商業，票房好壞，唔在乎，真係養起業界唔少人。最令人拍爛手掌，係終於攞到金像獎影帝當晚，致詞時拎住張貓紙，呼籲要為香港電影打氣，獎項未到手，已經諗定得獎感受要講呢啲，想唔畀Like佢都唔得啦！

佛得嚟有火，只限工作、家人同朋友。堅持同阿媽住，朝朝要阿媽拍醒起身返工嘅古仔，N年前同黃?瑩分手後，一直係寡佬，最佛系一定係對感情：「唔拍拖、唔出街，冇事就留喺屋企，緣分到，自然有老婆。」

----------------------------

東網巨星開咗ig喇，大家快啲follow啦！