【三級片專業戶】梁焯滿肺有陰影驚係Cancer

2018年05月19日 00:01
東網電視
更多新聞短片
梁焯滿認真係地獄黑仔王!

1989年香港小姐季軍梁佩瑚胞弟梁焯滿入行逾22年,拍過多部三級片,被網友封為「三級片專業戶」,最令人印象深刻是《古惑仔》系列「肥屍」一角,惟多年來星途平平,多演小角色,反而黑仔事件一單接一單,去年驚爆他與2003年結婚的太太陳靜霞於2006年已離婚!

唔介意被叫茄喱啡

昨日梁焯滿被發現現身伊利沙伯醫院胸肺科,身形瘦削的他拿着一袋文件,全程愁容滿面,又頻頻傾電話及Send訊息,在醫院走廊踱步。事後記者致電梁焯滿求證,他承認到醫院求診,因最近做身體檢查時發現肺部有事,照X光肺部出現陰影,可大可小!

梁焯滿坦言擔心患肺癌,現正排期作進一步治療,希望吉人天相:「驚係Cancer,心情梗係唔好同擔心啦!可能係以前食得煙多,有時返大陸登台,人哋畀煙又唔好意思拒絕,但呢一個月已經完全戒咗煙。」他直言家人非常擔心,但相信他們無論精神上或經濟上都會支持自己。

問到其經濟狀況,梁焯滿表示有買保險,加上近年經常登台,又有執導拍戲。對於人生似乎充滿黑仔事,樂觀的他說:「每個人都有高低起伏啦,我又唔會諗得太悲觀,好似拍戲咁,以前會介意人哋話我係茄喱啡,但近年已經冇所謂,既然我鍾意呢個行業,就會一直做落去。」

不影響搏殺計劃

梁焯滿又稱即使健康出現問題,仍然不會停工,繼續登台搵銀,並會擴充汽車美容生意業務。而他早前自編自導自演的內地網絡大電影,請來一眾好友參演,計劃再拍一部,更兼任投資者:「內地市場好大,唔想放過呢個機會,個病再睇吓點,暫時唔影響我搏殺嘅計劃。」

----------------------------
東網巨星開咗ig喇,大家快啲follow啦!
https://goo.gl/KGuo2N