初戀系男神！中港台韓小鮮肉點樣揀？
20180519
東網電視
更多新聞短片
初戀呀！初戀呀！
千金難買愛情，一生人一次嘅初戀更加係買唔到，不過好彩依家有電視劇，各種浪漫又令人心動嘅劇情，肯定滿足到大家嘅少女心。以下呢八位中港台韓炙手可熱嘅小鮮肉，更加係令人見到就想談戀愛，兼且大嗌一句：「初戀呀！我要初戀呀！」
香港－余德丞
其實香港都有唔少養眼小鮮肉，當中藝人余德丞作為前香港游泳代表隊成員，一身爆肌身材唔在講，早前仲喺無綫劇《誇世代》齋着泳褲，半裸大晒42吋巨胸，睇到觀眾㷫烚烚。加上余德丞嘅青靚白淨外表，仲有陽光笑容，自然冧暈唔少女Fans。
香港－丁子朗
港男出身嘅丁子朗出名身材火辣，佢上年喺無綫節目《歎得好健康》大方露肉，經常赤膊上身浸溫泉，盡顯結實身形，睇到一班姐姐流晒口水。其實丁子朗嘅人魚綫亦相當明顯，佢曾透露每日狂練腹肌，加上做過百下Sit up先練成呢副性感Body。
韓國－丁海寅
憑大熱韓劇《經常請吃飯的漂亮姐姐》上位嘅丁海寅，身高1米78嘅佢擁有一副Baby Face，被指與男神金秀賢「撞樣」，加上佢不時喺幕前大騷六嚿腹肌，有顏值又有身材，難怪成功俘虜全亞洲姐姐嘅心！丁海寅經常喺韓劇做女主角嘅初戀Oppa角色，包括《請回答1988》及《鬼怪》等，因而獲得「國民初戀」嘅稱號，名副其實係初戀系男神！
韓國－南柱赫
曾演出韓劇《Who Are You學校2015》及《舉重妖精金福珠》嘅南柱赫，係高顏值嘅單眼皮男神代表，仲要擁有1米88嘅大隻身形，天使面孔同魔鬼身材嘅配搭，難怪儲落唔少少女粉絲。再加上南柱赫喺劇中化身暖男學長，一直守護住女主角，仲會使出摸頭、背後抱等必殺技，令觀眾睇完勁心動，少女心爆發。
台灣－劉以豪
台灣男星劉以豪憑陽光男孩形象大受歡迎，近年仲憑台劇《我可能不會愛你》，紅到去韓國添！佢用溫暖嘅笑容融化一班韓妹，喺當地有「微笑天使」之稱，望真啲仲同韓國「國民初戀」丁海寅好似樣。貴為男神嘅劉以豪從高中時期就係萬人迷，收過唔少女同學嘅情信，但佢曾自爆讀大學時先第一次拍拖咋，真係好Pure好True呀！
台灣－蔡凡熙
台灣小鮮肉蔡凡熙上年參演首部劇集《通靈少女》，飾演溫柔學長嘅佢不但攻陷女主角嘅心，仲俘虜無數少女而爆紅，被視為未來嘅男神接班人。唔講唔知原來蔡凡熙入行前係棒球運動員，難怪有番咁上下大隻，加上1米85高嘅Model身形，以及可愛外貌嘅反差萌，令人忍唔住講一句：「真係太犯規啦！」
內地－胡一天
要數當紅小鮮肉，不得不提演出內地劇《致我們單純的小美好》嘅胡一天。佢喺劇內劇外都大受歡迎，皆因集高顏值、長腿及學霸於一身，再加上熱愛運動，簡直係學生時代典型嘅萬人迷學長！唔少少女都畀胡一天迷倒，仲話見到佢喺《致》劇嘅學生Look，成功勾起對於初戀嘅美好回憶。
內地－劉昊然
內地男星劉昊然向來有「國民初戀」之稱，皆因佢擁有清秀容貌同暖男性格，獲讚充滿少年感，係少女心目中嘅初戀男友代表。呢位「國民初戀」一直係少女殺手，有傳佢早年為電影試鏡，導演為咗測試佢嘅觀眾緣，搵嚟素未謀面嘅女性工作人員選擇投唔投票畀佢，結果大部分人都有投票，可見佢深受異性歡迎。
如果有得揀，你哋又會揀邊位初戀系男神先？
----------------------------
東網巨星開咗ig喇，大家快啲follow啦！