女星蔡卓妍（阿Sa）到尖沙咀太空館拍攝新戲，早前她到美國出席好姊妹鍾欣潼（阿嬌）婚禮，前日才返抵香港的她笑言：「仲有少少Jet Lag，但好彩今日講我見工失敗，個樣懵懵哋都OK。」

「意頭嚟啫」

提到阿嬌在婚禮派對上親手將花球交給她，問阿嬌是否有所指，暗示她是下一位新娘？阿Sa笑說：「意頭嚟啫！我完全冇諗過出去搶花球，不過Joey（容祖兒）夾晒戲話出去，仲喺後面夾住我，鄭希怡喺遠處?實，好似係一早夾定。」阿Sa透露阿嬌現時仍在美國。講到因阿嬌的婚禮而錯過與男友慶祝生日，問到如何補祝？她說：「食餐飯啦。（生日禮物送乜？）一早送咗，我哋呢啲醒目㗎。」

講過一齊去百慕達

另外，阿Sa表示已十多年沒來太空館，今次電影主題是UFO。她又謂聽夏韶聲講過不少，但自己則沒有見過，但亦相信有UFO存在，期待有機會見到：「我好鍾意有神秘、歷史嘅嘢，例如金字塔、羅馬競技場、秘魯馬丘比丘等等，以前仲同阿嬌講過想一齊去百慕達。（阿嬌做咗賴太，依家要一個人去？）唔會，佢唔係咁嘅人。（結婚蜜月時去？）到時再算啦！」