懸紅1萬尋相機 琦琦私照被偷嘆可惜

20180603
東網電視
更多新聞短片
琦琦指成為腕錶設計師是她的夢想。
名模琦琦瓣數多多,除了設計自家品牌珠寶外,設計上癮的她,近日化身腕錶設計師與萬希泉合作推新錶,早前她親自上陣拍攝宣傳照,分別換上白色及紅色兩個造型,鏡頭前架輕就熟地擺出多個優雅姿勢,但原來她卻是負傷上陣,琦琦依然堅持完成拍攝工作,態度專業認真,她說:「我之前做運動拉親條腰,都睇咗跌打,拍攝時又唔小心跣親,令腰痛情況加劇,嗰日都有即刻叫助手幫我買啲膏藥頂住,影完相之後先搵醫生睇。」
情願唔見錢
作為名模的琦琦,型像百變,提到是次的兩個不同造型,她卻笑言不習慣,她說:「其實我係唔太慣wet look,因為我鍾意乾淨啲嘅感覺,不過在場嘅形象設計師、攝影師、化妝師全部都話wet look好,所以我就信佢哋啦!我都好聽人哋意見嘅。」她表示當天其私人化妝師替她拍了很多很美的相片作紀錄,但相機竟然被盜竊,相片全部遺失,令她大嘆可惜。她失落地說:「相機裏面有工作相又有私人相,主要係紀錄低自己做嘢。不過其實都好擔心,因為裏面有好多同朋友影嘅相,已經報咗警。我情願唔見錢,都唔想唔見相機,裏面啲相有錢都買唔番。」
琦琦之後又向東網表示化妝師是在乘坐機鐵離開時,畀人偷走相機:「去過警局兩次,不過都唔知喺邊度畀人偷咗,好難。(相機裏面仲有乜嘢相?)之前幾日工作嘅相,仲有老公同個女啲生活相,好私人嘅相。(擔心照片外洩?)都唔驚,我又唔會影啲乜嘢相,不過啲人攞嚟都冇用,不如畀番我,我個化妝師佢好內疚,出五千獎金,喺電台呼籲咗,希望有心人畀番啲相我哋,依家我加五千,但係都過咗成半個月,都應該凍過水,最傷心係啲相未儲存,影唔番。」
因贊助電影結緣
當天萬希泉創辦人兼行政總裁沈慧林(William)亦專誠來探班,與琦琦分屬好友的他,順道聚舊,提到二人的相識過程,William表示最初因贊助電影《我的情敵女婿》而與影帝任達華(華哥)結緣,指華哥對陀飛輪亦抱濃厚興趣。William說:「佢嚟咗我哋公司參觀陀飛輪研發室同埋欣賞木雕,最初本來係同華哥傾合作,但後來經介紹下識咗琦琦,琦琦都對設計好有興趣,而且佢又對時尚同珠寶好有研究,就促成咗今次嘅合作。」
爆任達華正動手設計
William透露是次腕錶以「四季」為主題,此為系列的第一擊,接下來還有不同的合作。琦琦坦言成為腕錶設計師是她的夢想,如今夢想成真,令她既興奮又緊張。問到華哥有否於設計上給予意見?她說:「有呀!其實綠色嗰隻錶嘅設計靈感係源自華哥,因為佢好鍾意綠色,所以我先特登揀咗呢隻咁大膽嘅顏色。而且今年綠色好hit,又畀人一種永恆嘅感覺。」William更大爆華哥正動手設計腕錶,笑言兩夫婦是「星級設計師」。琦琦透露華哥現正忙於拍電視劇,故二人亦沒有很多見面機會,但指華哥已向劇組請假,出席見証她設計的腕錶發布會。
是次「琦琦設計系列-維也納的春天」腕錶設計靈感來自她長大的維也納森林,並加入了「童話之森」元素;小公主穿梭於春氣盎然的森林中,除了看到鹿子、蝴蝶等生物,更發現兩隻兔子盪鞦韆,走進夢幻國度。