孖江若琳拍婚照　蕭潤邦怕醜仔上身

江若琳（Elanne）第三度為婚紗店代言，之前與8年拍檔王浩信、蕭正楠，今次終於與真命天子、未婚夫蕭潤邦（Oscar）成為拍檔，Elanne感覺特別興奮。

Elanne：「入行咁多年，拍戲、廣告，其實我大大話話着過十幾次婚紗，以前係無乜感覺，只覺得係戲服一件，今次拍檔係未來老公，終於覺得原來着住件婚紗都幾感動，同埋會好期待睇相」

問到Elanne對今次拍檔嘅表現評價？Elanne則勸Oscar繼續努力做生意：「Oscar可能好多年無做幕前，縱然佢有model嘅身高，但係佢一對住鏡頭就好怕醜、唔係幾自然，所以其實今次大家揀相嘅過程唔係好困難，只要揀Oscar表情自然、無眨眼嘅就已經好快，佢都係繼續努力建立佢嘅生煎包王國啦，哈哈！」

今次拍攝地在香港，問到Elanne同Oscar之後會否到外國再影婚紗相，佢哋話一定會：「我哋係好鍾意去旅行，所以今年每去一個地方都會影啲相，有啲好生活、有啲好正式，想有多啲唔同嘅相留念。」