相識30多年 鄧達智指林燕妮入院唔畀人探
才女林燕妮病逝,好友鄧達智親證:「今日我收到朋友嘅message話林燕妮前日過咗身。」問到可有見林燕妮最後一面?他說:「佢唔畀人探,我喺一個月前知佢入咗醫院,之前知道嘅朋友就畀見,但當我收到消息時,佢就已經唔畀見。」據他所知林燕妮之前經常出入醫院,對林燕妮死於肺癌,鄧達智說:「佢大約7、8年前有淋巴癌,嗰時未係好嚴重,但淋巴癌比較難醫,之後又有肺癌。」
他指自己最後一次見林燕妮是上年的事,他說:「我哋有個圈內朋友生日,林燕妮都有出嚟,其實佢外表一路都冇問題,keep得幾好。」有關林燕妮的後事安排,他指林燕妮四十幾歲的兒子會負責去搞。
鄧達智跟林燕妮相識30多年,他說:「佢係我喺英國返嚟最早識嘅朋友之一,林燕妮同黃霑分手期間,佢成日約我去ball,做咗佢個partner,呢段時間都維持咗好耐,大家都知道我哋係好朋友,又唔會傳啲咩。」他大讚林燕妮為人好nice,不過有時個人會比較情緒化,他說:「呢啲都係女仔問題,佢有時會記錯嘢,將啲唔係事實嘅嘢當係真,有時會有啲爭拗,不過唔係同我,係同啲女仔,但我唔講邊個。佢天生好貪靚,貪靚嘅程度有幾誇張?可以不惜工本買一件皮毛,佢幾十年前可以用幾十萬去買一啲皮草大褸,佢好鍾意皮草大褸,佢有好多件,佢又鍾意某個品牌,係成個系列有齊晒。」