新進女藝人何雨瞬最近以「寶貝女神」身份，參與6月中播出的面包台世界盃節目及拍攝女神寫真。問到可要性感現身？她認為不算，又覺得穿比堅尼很平常：「我身材都唔差，show多啲OK㗎！（鍾意睇波嗎？）鍾意睇靚仔！好鍾意阿根廷同法國隊。」至於會否陪男友睇波？她就大呻很久沒拍拖：「冇人追呀！我要求唔高，有咁上下高、靚仔同有錢就得。（有錢到點？）最好有私人飛機啦！（想對方照顧你？）都會，經濟有一定能力，滿足到我想要嘅嘢。（好鍾意買嘢？）梗係啦，最鍾意旅遊，最想去芬蘭睇極光！」

鍾情「大叔」

何雨瞬自言喜歡大叔型，還自爆早前追求一位比自己大接近二十年的男士：「對方可能覺得我係細路女就唔會主動，所以我鍾意就會主動約佢，直接問佢得唔得閒，咁樣成功率高啲。」她指家人很支持自己尋覓喜歡的人，可惜這次神女有心，襄王無夢，是她近期最傷心的一件事。提到找到對象後可會退出娛樂圈，她就直言不會：「因為呢行好玩，可以令多啲人識我，我又鍾意拍戲。（如果另一半想你退出？）我會嘗試說服佢，我唔係愛情至上。」

預告孖于海拍戲

工作方面，何雨瞬透露會與李連杰師父于海拍攝關於拳擊的電影，因此最近有練拳、健身和瑜珈：「一日練兩個鐘。（有冇特登食少啲？）完全唔使，我好鍾意食好嘢㗎，最緊要係健身。另外我喺王晶嘅新片都有演出，希望大家多啲留意我，我唔劇透啦，不過我個角色比較性感，都有啲激情戲。」

髮型、化妝：Twiggy Wong@Dickteam