大玩棟篤笑!胡楓羅蘭組隊嗌「情侶冇天裝」

2018年06月14日 22:02
東網電視
更多新聞短片
胡楓與羅蘭上台大玩棟篤笑。

張敬軒紅館演唱會開鑼,當「降兩度」落台後,嘉賓胡楓及羅蘭上台玩棟篤笑。先上台的胡楓表示有一日演唱會監製打畀他:「話軒仔搵我做嘉賓,我好開心,但點知監製叫我唔使唱歌,叫我講嘢就得,你估我係黃子華咩?我就應承住先,但上到台我鍾意做咩都得。」之後就清唱《愛是永恆》副歌。此時穿上與胡楓同樣西裝的羅蘭上台,向胡楓表示:「我喺下面係咁等你。」大家笑,胡楓即講大吉利是,羅蘭就解釋是升降台下面。胡楓又笑言他們的「情侶裝」:「你做過《武則天》,咁我哋就叫「情侶冇天裝」啦。」

之後兩人又講到認識軒仔的經過,羅蘭表示:「幾年前容祖兒搵我拍啲嘢,就喺軒仔屋企,呢個後生仔出現時,就話『我知你係天主教徒,我喺意大利見到個好靚嘅十字架,送畀你』,我覺得呢個後生仔對老人家好有心。」胡楓就搞笑謂不識軒仔,但讚他很好:「對長輩尊重,好勤力、叻仔,佢2年前有風浪,但都勇往直前,依家出人頭地。」羅蘭唱了一段《漫步人生路》後,兩人就降下台,並宣布張敬軒演唱會正式開始。

然後軒仔出場,身穿紅噹噹紅色羽毛服裝的他唱出《酷愛》等曲,唱完後表示這一part是火,搞gag笑言:「所以我就係隻『火雞』。」然後就行去觀眾席附近飲水,並讓男觀眾餵他飲。接着他多謝胡楓及羅蘭做嘉賓,表示在他們身上學到敬業樂業的精神。他亦謂生活上經歷很多考驗,很感恩大家來支持,2014年演唱會後仍買飛來支持,亦多謝屋企人及同事:「特別呢兩年經歷無法想像、痛苦不足外人道,所以要多謝楊受成先生。」然後唱出《缺》。唱到《兩座位跑車》時,身穿紅色西裝配肉色打底衫的軒仔行勻四面台握手。