湯美李父親節與阿仔隔空開火　一地花生

不少荷里活名人紅星都於社交網分享開心過父親節的Warm爆照片，不過月前被自己與前妻彭美拉安德遜（Pamela Anderson）所生兒子Brandon痛打的美國著名音樂人湯美李（Tommy Lee）就過咗個不平凡的父親節，「惹火」收場！

湯美李最先於社交網Instagram上載自己與爸爸的黑白照，撰長文念親恩之外，亦有講到爸爸曾教他要尊重每個人和每件事，以及凡事感恩，不過當他有小朋友時，想教曉他們同樣道理就不成功：「如果佢哋整爛嘢，佢哋唔會在意，因為佢哋會有新嘅，如果佢哋傷害咗人，佢哋亦唔會關心，因為有好多人同佢哋講係『冇問題』嘅！」湯美李雖然未有開名，但就指阿仔的不當行為與他們的媽媽有很大關係，直指彭美拉教壞兒子！他於文中最後又表示：「我好愛我嘅仔，但佢哋真係X街。」

而22歲的Brandon事後亦有反擊，留言寸爆老竇：「如果你認為我哋咁壞（而我可以好肯定話你知我哋唔係），咁你就應該似返個男人好似我咁，去湊大我哋！」他更叫湯美唔好再搞事，另有傳彭美拉都支持阿仔。