陳法拉關心愛貓多過男友

藝人陳法拉出席品牌活動。講到她簽約美國經理人公司，她表示有為當地電影及電視劇試鏡，而九月可能會開戲，是部美國電影，但詳情就不能透露。問到可是很興奮？她表示：「冇嘅，因為之前都試過合約都傾埋，但之後又冇咗，所以我開機嗰日先當係真啦。」問到可會返香港拍戲？她表示：「今日先見完個導演，搵緊啲好想做嘅角色，製作幾大冇所謂，最緊要故事吸引同有得發揮。（例如想做咩角色？）咩都想試，最緊要有得發揮同挑戰性。（你想拍劇定拍戲？）冇乜所謂，其實美國嘅戲同劇都係同一班人拍，佢哋啲劇都係8集、10集咁樣，所以對演員嚟講分別唔係太大。」

講到她好像比以前fit，法拉笑言：「其實冇再上堂已經鬆懈咗，要開始做番gym，以前上堂體力消耗大，依家畢業個幾月feel到好似謝謝地咁。（男朋友會唔會唔捨得你出嚟做嘢？）唔會呀，佢好支持我。（佢會唔會嫌你太瘦，叫你食多啲嘢？）唔會喎，冇乜所謂，其實我食嘢不嬲不受控制，佢又唔會管我。」

法拉亦謂今早才回到香港，留三日就走，今次都是回來出席活動及拍廣告，之後會返回美國，但如果香港有戲拍就會多些回來：「其實我隻貓喺美國，好掛住佢。（畀男友湊？）佢會餵佢，但長期屋企冇人隻貓會唔開心，如果我真係返嚟拍戲就要帶佢返嚟。（你擔心隻貓仲多過男朋友？）梗係啦！人識照顧自己，但貓要人照顧。」