做丁海寅見面會主持 嚴崇天勁讚對方牛奶肌
憑韓國熱播劇《經常請吃飯的漂亮姐姐》上位嘅30歲男神丁海寅,日前來港舉行首個香港粉絲見面會,而奇妙電視主持嚴崇天(阿天)就擔任主持,阿天話事前好緊張,仲搵韓文老師補習韓文。
見面會開始前,阿天可以同丁海寅近距離接觸,阿天大讚對方:「佢皮膚好好,係牛奶肌,零瑕疵!」丁海寅又對阿天直豎拇指,完場時仲鼓勵阿天,阿天興奮表示:「佢專登走嚟同我講,辛苦晒,做得好好,我好開心。」不過當日都發生咗件驚險事,阿天話:「有個環節粉絲可以同丁海寅用寶麗萊相機影相,點知一部壞完到另一部,之後改送簽名海報,同埋用相機影相。」最後阿天仲獲對方粉絲讚做得好,話佢講嘢好好,不過阿天自覺仲有好多不足之處,要繼續努力。
----------------------------
東網巨星開咗ig喇,大家快啲follow啦!