《美女廚房》吳紫韻26歲生日　學徒齊慶祝

無綫節目《美女廚房》嘅美女學徒吳紫韻（Purple）近日忙於拍攝節目，日前26歲生日嘅佢，獲得成班美女學徒慶生，Purple嗌晒感動：「嗰日我哋喺TVB廠由8點開始拍到凌晨，雖然好攰，不過之後大家都同我喺canteen慶祝，大家叫餸食飯，叫到成枱都係餸，感覺好似一家人食飯咁，好warm。」

另外，Purple又話圈外朋友亦有同佢慶祝，仲專登將場地布滿唔同氣球，又預備咗個好靚嘅蛋糕送畀佢：「本身佢哋就約我去一間朋友開嘅餐廳食飯，點知一去到佢哋布置得咁靚，真係好驚喜，因為佢哋知道最近我工作好忙，所以安排咗呢個驚喜派對氹我開心。」佢仲話初頭有朋友見到相以為係求婚派對，非常搞笑，Purple都好感激朋友們嘅心意！