33C倪辰處女出寫真 沙灘畀人認錯薛凱琪
由模特兒轉型做歌手的倪辰加入今年寫真戰團,對於處女出寫真,有翻版薛凱琪之稱的她表示,今次主要行日系路線,當中最吸晴的當然是泳衣造型,見她谷盡33C上圍,十分Big爆!她表示今次性感造型與平時很不同,笑言差些認不出自己:「同我本身個look好唔同,我平時都唔係行性感路線,今次出寫真好多fans都好嘩然,我自己都嚇咗一跳,原來我都會影性感相,但多謝咁多fans支持。」
講到今年有好多強勁對手,問到她如何突圍而出?她謂:「我第一次出寫真,會多啲新鮮感,同埋我都會落去書展,希望吸引到更多fans撐場,不過呢啲都係公平競爭,我覺得寫真只係其中一個階段,我主要想行唱歌路線。」問到目標想賣出幾多本?她表示:「公司第一批印咗一萬本,我希望書展期間可以賣到5,000本!」至於講到她長相跟薛凱琪有幾分相似,她笑言由中學開始已經好多人這樣講,在泳灘拍攝時亦有泳客認錯她是薛凱琪,她很開心可以跟偶像似樣。
三圍:33C-24-33
年齡:24
----------------------------
東網巨星開咗ig喇,大家快啲follow啦!