影后都要打雜？劉嘉玲爆偉仔係大老爺

藝人劉嘉玲接受鄭裕玲電台節目訪問，她稱每隔幾年便會演一次舞台劇，因為演舞台劇令她上癮：「我覺得每次做完一次舞台劇，再去拍電影都會有好大幫助。」問返屋企可有找老公梁朝偉（偉仔）幫手排戲？她笑言：「唔得嘅！（圍讀呢？）冇冇冇，佢冇睇過劇本，但對吓台詞都可以嘅。（係咪叉住腰咁同老公對台詞？）唔會啦，呢啲係你哋打造咗我呢個形象，其實我屋企乜都做，打雜咁。（又睇唔出喎？）我做晒屋企所有嘢㗎，佢係大老爺嚟，好似燈壞咗，佢都會叫我搞掂佢，佢又唔識啲新科技，會問電視機點開㗎？我要寫低晒畀佢！」

另外，提到忙於排舞台劇之餘亦要身兼老公經理人？嘉玲即再次澄清：「我唔係佢經理人，佢係因為同舊公司約滿，暫時未搵到經理人嘅時候我幫佢聯絡人啫。（即係要先過你嗰關？）唔使經我呢關，我只係負責pass message畀佢，決定都係佢自己。」