一字排開騷肌　Bob個樣似谷屎

藝人林盛斌（Bob）最近同楊潮凱、區永權、楊詩敏（蝦頭）等去咗惠州拍攝綜藝節目，佢哋仲大玩濕身誘惑，呢日Bob就上載一張男士們齊齊裸露上身谷肌嘅合照，相中嘅Bob谷到塊面紅晒，個樣似足谷緊大便一樣，佢留言話：「到咗惠州，都係嗰句，我真係冇谷㗎......」網民都讚Bob呢個表情一流！

之後楊潮凱再上載同一張「肌男相」，留言話：「今次大家真無搏老命呀！」而蝦頭上載嘅合照就「正常」好多，Bob坐喺水泡上化身做「佛系Bob」，蝦頭仲留言話：「我哋喺惠州暢泳中！笑到甩肺！」