女人心海底針!「大小姐」喪鬧完即變臉呵番

2018年07月12日 22:32
東網電視
更多新聞短片
真係女人心…難測呀!

有追開無綫處境劇《愛.回家之開心速遞》嘅觀眾,呢幾晚實開心到瞓唔着,皆因劇中人氣最高嘅CP「大小姐」林淑敏同「送水輝」許家傑,終於有情人終成眷屬,正式發展做情侶關係啦!雖然佢哋終於開花結果,但唔代表可以公開拍拖,始終身份有段距離,惟有暫時玩地下情先。

新一集講到佢哋為咗喺公司掩人耳目,「大小姐」當住咁多人面前奚落「送水輝」,仲鬧到對方一文不值咁:「你呢隻人頭豬腦,咁簡單嘅錯你都可以犯嘅。」、「你返去送水啦!」繼而玩人身攻擊,取笑「送水輝」唔靚仔,又話佢日日Gel行個頭返工,點知就曝露咗髮線高嘅弱點。最慘嘅係明明講好咗做場戲啫,但「大小姐」入晒戲鬧得勁狠,連男人最痛都攞出嚟講,令「送水輝」無辜受氣,相當搞笑!

鏡頭一轉見到「大小姐」返愛巢,仲變到小鳥依人咁氹番「送水輝」,幫對方抹汗又攬到實一實,Sweet到爆!「大小姐」仲不斷講好說話氹人,最冧嗰句係「就算你將來變咗地中海,我都一樣咁鍾意你㗎」,難怪「送水輝」冧爆兼好快下氣啦!雖然唔少網民睇完呢幕都大讚好Sweet,但有「巴打」感同身受,大嘆女友同「大小姐」一樣咁難捉摸,果然女人心海底針,仲貼心提醒「送水輝」唔好中伏添!

網民有話兒:
XXistyFoXX:女人真係好難捉摸!
XXXok Ho:熟悉嘅對話T_T
SaxxxxYeXXX:今年女配肯定係大小姐!
LokXXXYI:咁樣落去大小姐會唔會人格分裂?