禍從口出！兒童節目主持鍾晴憎狗論遭圍插
20180713
東網電視
更多新聞短片
愛狗人士同埋家長齊齊鬧爆Karlie。
無綫節目《兄弟幫》每集都會請唔同嘉賓上嚟傾吓偈，之前就邀請咗兒童節目《Think Big天地》嘅主持上嚟分享吓佢哋嘅經歷，其中一位主持鍾晴（Karlie）一番討厭狗狗嘅言論，受到不少網民攻擊！
事源係Karlie話自己好怕動物，有一次去工廠區做嘢，點知有隻大狗喺附近搞到佢勁驚，憶述過程中佢愈講愈激動，言詞仲好有針對性：「工廠區啲狗特別…毛茸茸污糟，即係好…好乞人憎嗰啲呢！」仲話有朋友同佢講見到狗要扮唔驚，因為咁樣啲狗就唔會嚇佢：「都唔知佢（狗狗）咩心態！」
呢番言論即時辣㷫晒一班愛狗人士，佢哋喺網上發文鬧爆Karlie講嘢冷血完全唔識尊重動物，其後亦都有家長級人士留言話佢嘅言論教壞細路，冇資格做兒童節目主持。有唔少人直接去咗Karlie嘅Facebook留言狂插佢言論不當，短短八個鐘頭，已經有超過400個留言。
當中有網民表示狗同人一樣，邊個唔想一出世有人錫有好環境，但係有啲嘢冇得揀，怕狗係冇錯，但係人Mean先乞人憎！唔少人都批評鍾晴冇同理心、冇愛心同冇腦！不過圍插聲音都唔係一面倒，有部分網民留言話唔覺得佢咁講有問題，認為唔鍾意狗、怕狗講出嚟都係一種坦白，純粹講個人感受唔明點解會有咁多人鬧佢。
網民有話兒：
AXXXX LXX：有頭髮邊個想做癩痢？邊個人出世唔想有＄有人愛，邊隻狗狗唔想一出世就有主人錫同佢扮靚靚？怕狗無（冇）問題，個人mean先乞人憎！無（冇）同理心無（冇）愛心，好低質
JXX XX：你可以不愛但請勿傷害 咁既（嘅）言語會影響到別人既（嘅）想法 點解用詞唔好小小呢
YuX XXX XXXX：我又覺得無（冇）問題呀，有人喜歡狗，有人唔喜歡，無（冇）大問題呀。
BXX XXX：只係話唔鍾意狗者（啫），點解唔可以講？又何解一定要灌輸鍾意狗既（嘅）思想呢？
----------------------------
東網巨星開咗ig喇，大家快啲follow啦！